Market Insight：內險股分段減磅

A股上市的北京銀行，同小米合作移動支付服務，前者股價彈升一成，證明中小型內銀股估值已經夠低殘，可以趁這類合作消息出現一下死貓彈。昨日香港掛牌的中信行（00998）及民生銀行（01988）都趁機炒高5.4%及2.1%。

過去兩日個市有點拉牛上樹，不過昨日埋單總算仲有76點進帳，收報22,664點，恒指即市高位22,708點，差些少完全回補今浪最後一個裂口22,659至22,722點。滙控（00005）都算誇張，一個月唔夠由86元被芬佬插到落78.5元，再來一招釜底抽薪，昨日返到去84.85元，升1.8%。

今鋪芬佬由撤資變到買番轉頭，確實令一眾魚缸友目不暇給，之前驚非洲及中東市場收入見頂，渣打集團（02888）由165元畀基金洗到落155元邊，近日輾轉升凸，昨收170.9元。證明睇錯市低沽高買，並唔屬於普羅散字派專利。

古勝冇點你

萬里長空

東風入股刺激唔大

怕中央有針對改善霧霾天氣的政策，一月內地汽車銷售唔錯，一眾車股股價卻未見受惠。東風集團（00489）落實認購法國標致汽車（Peugeot SA）股權，每股認購價7.5元歐元，涉資5.24億歐元，另外亦會斥資2.76億歐元作供股之用，總代價8億歐元。東風及齊齊注資的法國政府，各佔擴大後股本14%。

昨日歐洲市初段，標致股價彈升近9%去13.6歐元，股市對標致引入資金反應正面，去年內地車市大旺，東風年中時坐擁近250億元人仔現金儲備，交易引起的資金壓力應該唔大，不過可見兩三年內，標致受歐洲車市疲弱影響，形勢逆轉的機會唔大，東風昨跌至10.84元，睇走勢有機會試返二月初低位10.42元。

幾隻內險股一月保費數字陸續曝光，大致是喜出望外，最勁的新華保險（01336）原保險保費收入273.8億元人仔，按年上升1.3倍，國壽（02628）上升72.8%，平保（02318）升41.5%，太保（02601）升31.7%，中國財險（02328）亦有22.4%升幅。

短暫利好因素支持

假如睇番內險股的歷史估值走勢，的確相當驚嚇。國壽市盈率在A股爆破前，就曾經是40倍樓上，以綜合大行預測一四年盈利352億元人仔，預期市盈率是14.2倍，大約只是高峰期三分之一。

當然，○七年前A股大旺，內險股每次有新股IPO必定可以預先篤手指要貨，穩賺不賠，但今時唔同往日，滬綜指由6,124點到昨日得2,142點，唔見四千幾點旺市不再，IPO分餅隻的着數亦不復再，真係要落手落腳去做生意，硬係回望以前天咁高PE，是不合時宜，對比其他殘過地底泥的內銀股，內險其實唔算好平。

如果極度睇好A股，唔阻閣下衝浪，借內險股作為滑板。不過，近日A股反彈，一則歸功較預期理想一月新增貸款數字，古勝相信這主要係銀行去年埋數後重新放貸扭曲所致，二、三月先見真章；其次係二月IPO空窗期，促使早前炒新股資金回流二級市場，兩個因素睇落都會相當短癮。內險愈彈得近舊年十二月高位，在下認為應該分段減磅至係上算。

業績股隨時大爆發

昨日主板升幅榜首位係一隻名字好生面口的股份，就係亨鑫科技（01085）。該股前日收市後公布去年度業績，收入按年增加9.2%至12.3億元人仔，純利增加17%至7,880萬元人仔。截至去年底止第四季之收入同比增長約59%至3.86億元人仔，主要受惠於內地三大電訊營運商獲發4G牌照，令公司的射頻電纜產品需求有所增加。

以前日收市價1.2元計，該股去年度市盈率僅4.6倍，難怪業績公布後備受資金追捧，昨日高位見過2.8元，收報2.28元，升幅90%，市盈率8.7倍，一支大陽燭估值重回合理水平！

繼續發掘業績股，世達科技（01282）早前已就去年度業績發盈喜，預期去年度業績將由虧轉盈。昨日該股收升6%，成交增至1,598萬股，會否提早炒業績，不得而知。走勢上，向上兩個主要阻力分別在0.6元及0.65元。

古勝