絲絲尋日High Tea完上網，留意到金管局近月推出咗新一輯消費者教育專題，啲海報十分之可愛，同金管局平時畀人嘅嚴肅形象唔同，海報主角仲係一個菠蘿油妹妹，好有親切感，即刻打畀金管局問吓邊個度條橋出嚟。
金管局話佢哋請咗本地插畫師Helen Tam去畫呢一系列插畫，而Helen創作嘅「茶記包包系列」入面，菠蘿油妹妹係香港土生土長嘅港式麵包，形象生活化，絲絲就特別鍾意佢提醒大家現金透支息口貴嗰張海報，配合埋新年氣氛。
聽講今次金管局同事同製作團隊花咗好多心機，將技術性概念，用圖像同標語帶出，呢排仲播埋電台宣傳聲帶，用角色扮演去提醒大家一啲理財小貼士，出場人物包括有歌王、鐵鈎船長同要找卡數嘅皇帝等等。
絲絲記得兩個副總裁彭醒棠同阮國恒喺銀行界都有「歌王」美譽，唔知會唔會參與埋聲演呢？金管局發言人就話，希望用輕鬆、具創意嘅方法去發放消費者「智醒錦囊」，會考慮唔同宣傳方法，絲絲覺得即係個提議諗得過，出街效果肯定事半功倍。
余絲韻