要數馬年轉運的外幣，其中一隻一定係澳元。澳元反彈持續，上周四澳洲公布失業率升至6%，曾令澳元自0.908回落至0.892，不過反而成為投資者低吸機會。
依家的澳元，有少少似內銀股咁超賣反彈，大家都唔知道個反彈幾時完。
近日澳元反彈有賴美國數據轉差，市場將會轉炒美國聯儲局有機會減慢收水步伐，不過呢啲都屬炒作藉口，聯儲局大方向仍會退市，要對近日澳元反彈審慎啲，不能過分樂觀。
短線一浪高於一浪形態持續，暫時未見於0.9070出現太大沽壓，而上周公布失業率後澳元急跌然後回升，亦可視為買盤強勁，預期澳元仲有少少位可以升穿0.9080，挑戰下一阻力0.9170，不過0.9270阻力強，要再上一層樓就有啲難度，現價先追入又相當尷尬。支持位則已由0.8830向上移至0.8920，預期本周區間在0.8920至0.9170。
GMO CLICK環球通副總裁 陳健豪