絲絲講場:馮詠儀調職必有大Project

利邦(00891)尋日宣布,主席馮國經個女馮詠儀將由今日起調職為公司非執董,任期三年,每年董事袍金12萬元。公司嘅通告話,呢個調動可以令佢騰出更多時間處理馮氏零售集團(馮氏零售)嘅董事職務。

採購零售經驗超班

不過依絲絲睇,馮詠儀今次唔係調職咁簡單,因為馮氏集團嘅零售業務一向由馮氏零售管晒,今次打正旗號叫佢專心馮氏零售,管埋旗下利亞(00831)、同玩具"反"斗城(亞洲)等公司,睇嚟馮詠儀得到家族信任,放手畀佢打理更多品牌!

曾經做過意大利名牌Salvatore Ferragamo公關同Marketing工作嘅馮詠儀,亦喺集團嘅利豐(貿易)同利豐美國做過採購同批發,零售經驗十足。利邦籌備上市嘅時候,亦都係佢擔大旗,今次馮氏公開叫佢花多啲時間喺馮氏零售工作,唔知係咪同今年收購嬰兒服裝業務,以及馮氏集團同意大利品牌Furla成立合營公司有關呢?

馮氏零售上個月至收購咗南韓嬰兒及小童服裝零售商Suhyang Group70%股權,以擴展該服裝領域;冇耐前,馮氏集團亦同Furla合作,未來四年喺大中華區開設超過一百間分店,相信馮詠儀嚟緊至少有呢兩個大Project要跟!

余絲韻