絲絲講場：恒生李慧敏同千五人拜年
新年過咗冇幾耐，商界嘅拜年活動仲係好活躍，絲絲知道恒生銀行（00011）今個月十三日同十四日都舉辦咗新春團拜酒會，同1,500個客戶拜年，真係熱鬧到爆。
今次個酒會真係喜氣洋洋，梗係啦，恒生特登搞咗個鳳陽花鼓舞蹈表演開場，絲絲真係即刻哼起「左手鑼，右手鼓，手拿着鑼鼓來唱歌......」差啲跳埋舞添。恒生副董事長兼行政總裁李慧敏（Rose）就代表公司祝賀客戶馬年行好運，仲話好多謝佢哋咁多年嚟對恒生嘅支持！
Rose之後仲同一班管理層去祝酒，好似絲絲每星期都要打畀佢一次嘅恒生執行董事兼環球銀行及資本市場業務主管馮孝忠，仲有林燕勝、徐振文等等，祝大家好似駿馬咁活力充沛、事事順利、鴻圖大展、馬到功成，咁多祝福語，大家咁話啦！
團拜酒會似嘉年華
祝完酒，客戶通場走，成個場好似嘉年華咁，又有攤位活動，又有雜耍表演，拋球、扯鈴同轉碟呢啲懷舊玩意，真係好玩到震，絲絲同一個揸住揮春嘅「巨型金財神」影相，之後又逗到財神爺利是，真係唔想返屋企。諗諗吓，其實恒生下星期一同母公司滙豐（00005）一齊公布業績，絲絲希望恒生今年業績靚靚仔仔，派多啲息益小股民。
余絲韻