絲絲曾經聽聞如果地上有100蚊，億萬富豪包括蓋茨（Bill Gates）都唔會浪費時間執，因為富豪「秒秒鐘以球（一百萬）計」，彎低身嗰一秒都已經唔止100蚊啦！不過，蓋茨最近話佢唔會咁大嘥，佢願意彎腰執起佢，仲話即使係100蚊美金，都有好多用途喎！
蓋茨解釋，喺佢認為100蚊美金仲係一大筆錢嘅時候，佢已經有理財概念，況且如果有錢喺地上，可能係其他人跌咗，出於善意好應該執返起佢，然後物歸原主，因為跌咗錢嘅人會非常焦急！而假若跌錢嘅係佢，佢都會執起放去基金會，因為100蚊美金都可以幫到好多人咁話。
全球首富蓋茨冇土豪氣燄，但介意畀人話佢係「輟學生」。眾所周知，蓋茨同蘋果公司創辦人喬布斯、facebook創辦人朱克伯格一樣，都係冇完成大學學位就創業，不過原來蓋茨好介意「輟學生」呢個形容詞。佢話：「我讀咗三年大學，所修嘅課程學分都足以畢業，所以我唔係唔合格嘅輟學生，我只係無拎到學位！」睇嚟佢都幾介意咁多年嚟大家叫佢輟學生呢個名！
余絲韻