絲絲講場：飛達顏太笑談「第二春」
飛達帽業（01100）老闆娘顏寶鈴，一講開內地啲員工，就苦瓜乾咁嘅面口同埋好勞氣，不過尋日佢竟然笑笑口咁講話，今年春節後準時返工嘅內地工人到依家都未夠九成，但佢話唔志在，因為佢搵到「第二春」！
讚孟加拉員工勤力
顏太口中嘅第二春即係孟加拉廠房，佢依家每隔一個星期就要去孟加拉一次，同當地啲員工關係好好。
顏太仲大讚佢哋好單純好努力工作，一粒朱古力已經當寶咁，同埋仲識得感恩同將心比心，又會送番糖果及木瓜畀顏太，令顏太好感動，覺得好似返去時光倒流廿五年嘅內地咁。
所以，顏太眼見孟加拉咁窮，就主動提議成立一個基金，為員工嘅村莊提供福利，而且仲有好多其他個別幫助員工嘅例子添。
顏太講到孟加拉就停唔到口，佢仲話嚟緊會逐步縮減內地廠房嘅規模，希望深圳廠房員工由現時約2,200人減至1,500人，主力做番高檔產品系列，其他產能就轉移去孟加拉，咁樣會慳好多成本，因為內地員工嘅人工已升到5,000人仔，而孟加拉只係650蚊港元，真係差天共地！
余絲韻