絲絲講場：鱷王秘笈坐低冥想

絲絲成日都想搵本賺錢秘笈，早啲發達享受人生。著名對沖基金經理達利奧（Ray Dalio）賺錢能力夠晒巴閉，佢贈咗兩個字畀絲絲：冥想。呢招得唔得就唔知喇，但中外投資界的確唔少人有冥想同打坐嘅習慣，凱基證券亞洲營運總裁鄺民彬亦係其中一個。

達利奧掌管全球最大對沖基金公司Bridgewater Associates，大忙人都會忙裏偷閒，每日例行公事就係冥想兩次，每次20分鐘，呢個習慣佢已堅持咗超過40年，佢大讚練習冥想係成功秘訣。

冥想嘅技巧，在於安靜咁坐低並重複某啲語句，從而達到放鬆效果。達利奧話冥想好處多多，形容冥想時感覺就好似身處慢鏡頭之中，令佢平靜落嚟，繼而搵到更好嘅方法解決問題，因為若心情焦躁不安，所有事情就像發生得好快，以致無法好好咁掌握局面。達利奧仲話冥想可以激發靈感，感覺好似洗咗個熱水澡，突然就會靈光一閃。

冥想嘅功效如何絲絲不得而知，但達利奧就深信不疑，仲鼓勵員工練習冥想，為有意學習冥想嘅員工畀一半學費，喺辦公室設冥想室甚至組團冥想。

絲絲記得鄺民彬都有打坐習慣，絲絲尋日想搵佢講吓當中嘅好處，可惜搵佢唔到。佢之前受訪話，每日食完晏仔，會喺辦公室進行盤腿打坐一小時。佢話以前投資曾損手幾百萬，負面情緒氾濫，之後跟太太內觀襌修，自此養成打坐冥想嘅習慣。佢形容打坐係做自己思緒嘅旁觀者，可以觀察自己嘅思想變化。

余絲韻