Market Insight：醫療股投機跟進

港股選擇跟住無章法可言的A股行事，昨日再升237點收報22,535點，終於返到去舊年九月至今年一月，22,500至24,000點的大型上落區。不過，由於早前跌穿橫行區，意味支持變阻力。

市況反彈至現水平，基金開始轉向審慎，值得留意是沽空佔大市成交比率，過去兩個交易日回到8.9%及7.1%，可見就連淡友都陸續掉轉槍頭，博短線反彈子彈（購買力）消耗情況，將影響今次反彈可以延續幾耐。

古勝冇點你 2014/02/18

萬里長空

土豪欽點話升就升

近期資金選擇側重少數股份板塊，情況日益嚴重，部分二三線股有炒過龍之嫌。超過萬億市值的騰訊（00700），都可以一日升5.7%，昨日收580元創歷史新高，一隻股票貢獻恒指109點，成個市畀一隻股票推郁。強勢源自美資行富瑞（Jefferies）畀佢660元目標價。

點解係660元？無謂深究，按此一四年市盈率59倍，就算複合每股盈利增長可以維持每年28至30%，都唔可以話平，但古勝唔打算阻人發達，尤其今日網絡股概念唔講業績，近日無論券商或傳媒，對兩大內地網絡土豪染指任何生意，無論係金融、醫療或物流都清一色被睇好，享有神級估值，大家無謂拗頸，即管睇吓去到阿里上市時，泡沫可吹到幾大。

另外，聽投行朋友話，班內地大型科企高層十分熟悉資本市場操作，炒功比外資大鱷更了得，果然並非浪得虛名！睇科網股抖咗兩個禮拜又再嚟炒過，近日消息多多的騰訊股價再創新高，執筆期間傳來有輪商新發行的騰訊相關認購證，行使價1,100元，真係睇到古勝眼定定！獲阿里睇中的中信21世紀（00241），上周五已現大陽燭，估唔到昨日更大棍重上4元關，真係好似玩過山車，散戶持貨冇被震走真係抵佢贏錢。

此外，金山軟件（03888）炒分拆概念，股價升6.5%，手遊股更厲害，博雅（00434）一口氣升兩成，收報13.36元；而IGG（08002）亦唔輸蝕，升16.9%收場，報9.64元。粗略估計，單係騰訊、中信21世紀、IGG、博雅及金軟五隻股份，成交合共60億元，佔主板成交約一成。

科網股瘋炒膽博膽

或者喺阿里巴巴在港上市前，有批等住認購阿里的資金繼續停泊在港股炒作科網股，反正圍繞呢類股份的併購消息不絕於耳，不愁炒作藉口，阿里上市前必然係板塊估值最高的時候。不過，散戶跟風炒作要有心理準備，呢類股波幅較大，一不要有畏高症，因好多時升浪一來要有勇氣落場追貨，二要有Double or Nothing的膽量同能耐，先捱得住大戶震倉。

中國首都北京霧霾情況嚴重，在放水全面刺激經濟無望之下，市場估北大人的首要任務，是改善污染情況，煤炭、火電及高污染的鋼鐵股唔使睇住，焦點落在新能源、環保及醫療醫藥股身上。

醫療設備、醫藥及醫療服務之中，鳳凰醫療（01515）昨日啱啱破位，升5.2%收報13.64元，未破13.82元的上市新高，但收市計已經係上市新高。市場上，從事私營醫療服務的獨家村無其他選擇，難怪去年十一月以7.38元上市之後從未見較大調整，慢火煎魚咁上，多少見基金收貨收得好乾。

鳳醫業務概念獨特

鳳醫有三大核心業務，一，是經營私營醫療；其次以IOT（投資、營運、轉移）形式為第三方管理醫院及診所；以及為旗下醫院及診所提供藥物、醫療設備及醫用耗材的供應鏈服務。舊年上市集資，主要用來將北京公立醫院私有化，以及把IOT經營模式，擴展至河北、山東、山西、河南及湖北等地。

鳳醫是全國最大私營醫療企業，政府也鼓勵私營醫療系統發展，減低對公營服務壓力，其故事講真無懈可擊，唯一考慮係估值唔平，就算券商預測一四至一六年的盈利增長分別達70%、27.5%及27.8%，對比一四年預測PE 47.4倍，都唔可以叫做抵。唯獨該股概念夠獨特，市場無其他選擇兼且走勢亦見突破，短期實在有投機追進的價值。

古勝