彭博社引述美國證交會嘅文件顯示，向來係價值型投資者，持股通常以數十年計嘅股神巴菲特計劃跟持有40年嘅愛股、《華盛頓郵報》前出版商及母公司Graham Holdings分手，巴郡持有Graham Holdings股份價值約11億美元，相當於約173萬股股份或28%股權。文件又披露，巴郡同Graham Holdings正商討賣股事宜，但仍未達成協議，而巴郡保留減持股份或出售所有股份嘅決定。
Graham Holdings前身係華盛頓郵報公司，自去年將旗下報刊業務出售畀亞馬遜後改名。83歲嘅巴菲特，喺一九七三年擲1,100萬美元入股Graham Holdings，並出任公司董事，其後喺一一年退出董事局。
至於股神點解鍾情該股？原來佢老人家同Graham Holdings嘅前主席兼行政總裁Katharine Graham分屬好友，並且更指股神視她為學習榜樣添，咁Katharine咪係股神半個師傅咁滯？