農曆新年假期間，絲絲行過尖沙咀名店街，仍見到有內地客掃緊名牌。不過今年內地部分城市嘅名牌專門店，春節期間竟然「拍晒烏蠅」！原來中國反貪腐浪潮令奢侈品牌喺中國市場遭遇寒流，由去年起，到今年差不多成年，奢侈品市場銷售都未見「回暖」。
根據世界奢侈品協會數字，去年內地重點城市嘅奢侈品消費縮水五成以上，今年春節奢侈品消費更跌入十年最低點。
隨住反貪盛行，奢侈品行業庫存增加、客流減少嘅迹象愈嚟愈嚴重，有幾個奢侈品牌仲表示會暫停喺中國開新店，該會更預測大多數奢侈品牌今年喺中國二、三線城市會有部分門店要執笠。
當中最受影響嘅係以往內地官場互送禮品最受歡迎嘅手錶同男裝，其中手錶嘅銷量大跌逾95%。
今年農曆新年，有幾間內地國際奢侈品牌店都花盡心思吸引客源，推出各種優惠送禮推廣，但無論個人消費、公司禮品採購都係無人問津。睇嚟過去喺中國市場生意火紅火熱嘅奢侈品牌商都難逃業績大幅下滑嘅尷尬局面。
根據世界奢侈品協會日前發布「2014中國春節境外奢侈品消費統計報告」顯示，唔單至中國境內，連境外消費都雙雙下跌。不過，中國人仍然係境外奢侈品消費最大嘅群體，佔全球總體45.1%。