好多人話結咗婚嘅女人好難家庭事業兩得意，唔通連美國聯儲局主席耶倫都逃唔過厄運，新官上任就要喺事業同老公之間二揀一？
耶倫上任得唔係幾合時，撞啱當局就快要敲定新規例監管外資銀行喺美國嘅業務，來自瑞士嘅瑞銀當然係其中嘅監管對象，而耶倫老公、○一年諾貝爾經濟學獎得主阿克洛夫，就咁啱喺一個叫「瑞銀國際社會經濟研究中心」嘅學術機構擔任諮詢委員會成員，即刻惹嚟閒言閒語，話夫婦之間有利益衝突。
絲絲聽聞瑞銀喺一二年透過蘇黎世大學贊助1億美元成立咗呢個研究中心，可能因為冇被要求披露，耶倫喺上年向美國政府道德辦公室提交嘅財務披露訊息中，冇提過阿克洛夫喺研究中心從事無薪工作，對於呢幾日嘅蜚言蜚語，聯儲局發言人就反駁話阿克洛夫係受僱於蘇黎世大學而非瑞銀，而中心諮詢委員會主席費爾話瑞銀向來都唔干涉學術中心營運。
不過，聽講學術中心同瑞銀嘅關係一直被人指指點點，由於瑞銀喺○八年拎過瑞士納稅人救助，而近年又被指操縱基準利率和匯率屢遭調查，外界對瑞銀印象似乎麻麻，之前就有幾十個教授寫公開信批評，話瑞銀以前嘅所作所為正正係一間有違道德企業嘅寫照。
有人仲喺蘇黎世大學校園掛起「蘇黎世大學賣咗畀瑞銀」大旗，而學術中心嘅財務委員會有3個成員都係瑞銀高層，負責人更係瑞銀嘅前董事長。
有銀行審查員提醒聯儲局務必要避免利益衝突，睇嚟今次耶倫要令外界覺得佢係大公無私嘅包青天，減輕外界猜疑所帶嚟嘅影響，要做到老公都冇面畀，難度可以話高，亦可以話冇難度，就睇耶倫點做喇。
余絲韻