絲絲講場：長實「樓神」騎師look應節
尋日又係長實（00001）一眾高層粉墨登場，一年一度「大龍鳳」嘅日子，一向有「百變樓神」之稱嘅集團執行董事趙國雄繼續鬼馬，今年用咗騎師造型亮相，成班營業部要員，英姿颯颯示人，配合大會人強馬壯、威震四方嘅主題，氣勢逼人。
寓意集團馬到功成
趙樓神解釋，今年適逢馬年，為咗應節，特別構思出以騎師造型會見傳媒，原因係騎師代表住駕馭同掌控一切，寓意集團可以掌控整個局面，掌握銷情及買家需要，希望喺馬年可以一馬當先，馬到功成。
絲絲睇佢哋一身造型，應該都所費不菲，趙樓神自爆由頭至腳一身裝備，其實係循環再用。原來呢套裝備，係當年香港協辦奧運馬術比賽時，集團為宣傳樓盤而度身訂造嘅，當時全套成本要成4,000多元。
絲絲就覺得呢個做法好好，盛讚樓神唔介意着舊衫，充分表現佢哋有環保意識，在旁嘅公關大員十分識做，話趙生今時今日仲可以着番當年尺碼嘅衫，足以證明佢身形Keep得好好。