高盛首席外匯策略師Thomas Stolper，畀人改咗個花名叫「烏鴉口」，近日宣布會喺三月初前離職，自立門戶創辦一間外匯公司，Stolper喺外匯界名氣大，皆因佢係明燈，過去五年對客戶嘅投資建議幾乎全屬「山埃」，連佢都唔好意思，要向客戶Say Sorry。
著名財經網站Zerohedge，早喺二○一○年初，已經建議網友同Stolper「對着幹」，結果Stolper貼士全軍盡墨，畀Zerohedge笑足近一年，搞到Stolper特登寫咗封道歉信畀客戶承認錯失。
Zerohedge有博客見好就收，話交易員難得願意認錯，應該畀個機會佢，希望佢喺一一年可以有個新開始。
點知睇番佢之後幾年嘅預測，似乎無乜起色。佢嘅明燈指示，包括一一年八月初預測QE3將至，建議沽空美元，結果不到一年時間美匯大漲15%，一三年三月初佢建議揸歐元沽英鎊，不到一個月歐元大跌，Stolper被迫平倉，自稱輸咗2.8%，但佢仲未計客戶通常做10倍槓桿。
計絲絲話，佢嘅離開可以話係令廣大投資者失去一個精準嘅反向指標！以後無得「參考」佢嘅預測，諗落又唔算係一件好事！
余絲韻