Market Insight：鐵路板塊可博反彈

隔晚十年期美債孳息升0.04厘收報2.72厘，見兩星期高位，反映債商認為耶倫好大機會沿着老友伯南克逐步退出量寬的貨幣政策。華爾街三大指數一樣勁升，道指升192點，去到三星期高位15,994點收市。

股市投資者認為耶倫暗示未有耐退市，兼且超低息期可能拖得比預期更耐。到底邊個睇啱，邊個睇錯？睇嚟都無乜所謂，昨日亞洲新興市場股市氣氛回暖，市場當正耶倫係財神爺一樣看待。

古勝冇點你2014/02/13

萬里長空

真係估佢唔到，講的唔係三年唔發市嘅錦興（00275），一日狂升25%，而係一月中國進出口數據，昨日升市都係靠晒佢。一月出口按年升10.6%，因受惠於對歐盟國及美國出口大幅增長。彭博綜合43個分析師預測平均數係0.1%，即係實際數字比預測多出106倍！最樂觀一人估緊6%，又證明專家同擲毫有時準繩度都係差唔多。

今次對歐美出口增長所見，印證近日資金流向，押注成熟市場經濟復甦動力較強的預期逐步浮現，不過同時，成熟市場需求帶動新興市場，例如中國受惠程度有限的睇法，似乎太過悲觀。

蒙牛睇怕仲有得去

講番個市，昨推介的內房股終於見更多機構投資者的垂青，心水世茂房地產（00813）及中國海外（00688）升5.9%及7.4%，如果想在二線梯隊中尋寶，花樣年（01777）、融創中國（01918）及保利（00119）都值得參考。蒙牛乳業（02319）向法國乳業巨頭達能配售1.2124億股，集資51.53億元，以抵銷去年收購雅士利（01230）的現金代價所產生的未償還債務，達能則藉此增持蒙牛，由4%升至9.9%，成為第二大股東。

由於配售價42.5元較蒙牛前日收市價36.85元，溢價一成五，昨日蒙牛最高掃到上40.35元，收報37.95元，升2.9%。昨日高追咗都唔使愁，收市後恒指服務公司季檢剔除中煤能源（01898），加入蒙牛，睇怕指數基金今日點都掃番隻蒙牛上去。

去年中，收購現牧（01117）及雅士利，中期報告所見蒙牛短債由5.7億升至39.57億元人仔，計及手頭現金升兩成八去到74億元人仔，仲加埋十一月發5億美元五年期債券，斷估資金壓力解決。

當然，印公仔紙零成本就更盞，往後會唔會有大動作跟尾，值得留意。早排向雅士利買入非核心資產後，已經有分析員估下一步係兩者重整嬰兒奶粉業務及供應鏈網絡，一門三傑睇怕仲有排玩。

歐舒丹有上升水位

落後基金股中，古勝留意緊隻歐舒丹（00973）。公司三大主要市場依次係日、美、香港，芬佬早排怕今年日本提高消費稅累事，股價由22.9元高位向下，早兩星期見最低碌到落14.98元，累積跌近三成五。

近排日本央行派晒定心丸話毋須要量寬加碼都可以達到2%通脹目標，市場亦開始淡化消費稅的影響，依家基金主題係搵番啲成熟經濟國家收入股票，歐舒丹啱啱在15至17元之間打好個圓底，昨日大成交發力，一五年（三月結）PE 18.6倍，低於歷史的22.8倍，同一○年及一二年兩次高位32倍及28倍有距離，趁勢頭唔錯，短期博上番20至21元，上番歷史估值水平。

呢期班炒家轉咗口味，唔興炒新興產業板塊，轉睇番啲大落後的傳統中資股。昨日內險同內房股繼續向好，連帶水泥同航空等估值低殘的板塊亦有追捧，其中二線水泥股表現突出，西部水泥（02233）及山水水泥（00691）分別升6%及4%，三隻航空股南航（01055）、東航（00670）及國航（00753）升幅介乎2至4%。

南車時代作勢反攻

若然兩會前資金繼續流入傳統中資股，要發掘下一個可以博下追落後的板塊，不妨留意鐵路基建相關股份。中鐵建（01186）、中國中鐵（00390）、中交建（01800）、中國南車（01766）及南車時代（03898）股價均處於去年末季以來的低位，具博反彈條件。

近日南車時代股價在250日線24.2元水平反覆整固，昨日高位曾見25元，最後收報24.1元，下跌2.4%，短線如能確認成功考驗牛熊分界線承接，實在有條件展開反攻，扭轉去年十二月以來的降軌趨勢，目標上試50日線阻力26.4元，23元關支持未宜失守。

古勝