因咩事榮膺「全球首富」嘅蓋茨都要晚晚走去洗大餅？件事要由微軟創辦人蓋茨周一出現喺社交娛樂網站Reddit「任你問」（ask me anything）環節講起。
佢被問到有啲咩好鍾意做嘅事係冇人估到嘅呢，佢就話：「我晚晚都洗碗，雖然其他人會自告奮勇想幫手，但我就係鍾意自己嗰套洗碗嘅方法。」
每個人都有自己興趣，不過絲絲估唔到佢有鋪做家務嘅癮，佢對洗碗嘅熱誠同自信真係有啲意外。不過鍾意親力親為嘅佢，一啲都唔孤單，源自博客A Michelle Moment嘅潮語Dishwasher Packing Obsessive Compulsive Disorder（DPOCD），就係用嚟形容「患者」堅信自己擺碗碟技術一流，空間運用得最好，唔畀人幫手擺嘢入洗碗機，蓋茨咪係呢類人囉。據聞市場係有DPOCD賀卡添。
「任你問」嘅另一個問題，就反映到蓋茨幽默嘅一面。問題係咁嘅，「你會怎樣生產新一代避孕套」。蓋茨答得認真，以佢同老婆命名嘅基金「蓋茨‧梅林達基金」，喺十一月由812個新奇嘅避孕套設計方案中，揀出11個批出資助，希望可以研製出一種令男士覺得戴得舒服嘅新一代避孕套。
被問到比賽進展，佢好風趣咁話呢個係敏感話題，好多男人都唔鍾意依家嘅設計，相信若研發到令佢哋接受嘅款式，會有助抑制愛滋病感染，而其中一個獲資助嘅設計係利用納米碳管去減低厚度。
余絲韻