早排日劇《半澤直樹》旋風席捲香港，大家開口埋口都引用佢喺劇入面成日講嗰句名言，估唔到平日出名忙到爆嘅豐盛金融資產管理董事黃國英有追呢套劇，仲食正個熱潮用「十倍奉還」嚟做今年六月talk show嘅主題。
佢同絲絲講，有個客知道今年個主題，喺農曆新年時親自寫咗「馳騁股壇 十倍奉還」嘅揮春畀佢賀一賀先。如果投資可以十倍奉還就好囉，黃國英係咪以呢個倍數為目標呢？
黃國英笑言，呢個只係配合番talk show主線嘅噱頭，查實今年投資好高難度，難做過舊年，主要因為佢管理嘅資產規模大咗，加埋概念好嘅股票已經升咗好多，唔好嗰啲佢又覺得個股價唔會點升。舊年黃生隻基金回報有近32%，而一二年回報係28%左右。
踏入一四年已經一個月多少少，不過港股表現好似就麻麻哋。黃生話，依家管理資產近14億元，到目前為止佢隻基金表現暫時打和，算係唔錯添！
十倍奉還只係配合番talk show主線嘅噱頭，今年會講吓賺大錢方法。佢仲話到時會喺伊館搞，不過得一場，會請300個客戶。唔經唔覺，黃生今年係第三年搞talk show，睇嚟佢想年年搞咁喎。
余絲韻