理財創富：財圈筍盤 分析行情

投資冒險派 擇偶重和諧

彩兒：炒股男士似乎特別有魅力！

梁：大部分精於投資嘅人都有冒險精神，會較有自信。好多人在股場上「得個講字」，往往在升市後慨嘆錯失時機，就好似去年日圓大跌初期，我聽到十個有九個睇淡，但最後只得一至兩個落場，故可在市場贏錢的，大多「心口掛個勇字」。

康宏理財服務聯席董事 張言銘

御峰理財投資組合經理 香敏華

彩兒：睇嚟你在金融場上有唔少斬獲！

梁：好難講！每年的投資機會不同，一一及一二年的回報麻麻，但○九年買入的士牌，持有至近日放出，回報可觀，加上我早於日本三一一地震後開始沽日圓，持倉逾兩年，去年大幅受惠日圓貶值，故平均計，每年約有三、四成回報。

彩兒：咁你鍾意咩類型的女仔？要識得投資嗎？

梁：投資講回報，但擇偶則是另一回事，講心唔講金，故我較睇重內涵及心地，毋須識投資炒股。其實，兩人相處最好一凹一凸，否則容易引起爭執，屆時拗買邊隻股票就無謂啦。

彩兒：今年投資有咩策略呀？

梁：我着重能輕易轉身、像期貨及外匯等可24小時操作的市場。我今年會集中投資外匯，因市場公開透明，較易獲到第一手資訊，加上美國退市及加息壓力，美元會慢慢上，可繼續沽日圓。至於港股的投資機會相對較少，現已難找有紮實業務及增長潛力的公司，只可炒消息及政策，故我放在股票上的資金不多，約佔三成。

藉睇樓講市了解另一半

彩兒：對你來說，怎樣的女仔會較吸引？

張：我鍾意一些較獨立、開朗活潑兼有愛心的女仔，唔一定要精於投資，但識少少的話，可多個話題之餘，亦能建立共同價值觀。不過，講到尾，至緊要適合自己，毋須與人比較，兩人相處舒服便可。

彩兒：你與女朋友會共同投資嗎？她會否問你意見？

張：我哋經常分享對大市看法。目前而言，歐美股市可受惠經濟復甦，值得憧憬，其中可看好健康護理及生命科技，相關需求大增，我已投資相關基金睇長線。其實，我哋財政獨立，但有共同奮鬥目標，正在物色置業，而睇樓亦不失為一項幾好的拍拖活動，可了解對方在生活上的要求，有助雙方進一步發展！

彩兒：你打算結婚？看來財圈的筍盤將會減少！

張：哈哈，買樓後再決定啦！

彩兒：曾試過投資觸礁嗎？又曾否對伴侶感到失望？

張：當然有啦，猶記得○七年旺市時投資較進取，當時買入的股票曾在金融海嘯時挫四、五成，部分到依家仲未回本，但經一事長一智，自此會嚴守止蝕，取態亦較審慎。回望感情上最傷則要說回初戀，由中學開始拍拖至投身社會工作，曾以為是完美愛情，最後卻未能開花結果，畢竟當時年紀細未懂處理，現時已學會重視身邊人的感受，減少無謂的執着。

揀股要分散 愛情宜專一

高妹：你有咩投資心得？會要求另一半同樣理財有道嗎？

香：以前初入行時膽粗粗，加上股市暢旺就乜都炒，從而領悟出一套心得。睇大市，除要了解資金流向，亦可留意六大行業的重磅股表現，若同時轉強，即反映大市隨即上升，惟近日港股走勢反映後市仍然動盪。然而，現時我僅做長線部署，月供股票及新興市場基金。至於另一半，我只憑感覺、夾到就得，他是否精於投資理財，對我而言並不重要。

高妹：揀股考眼光，揀情人又如何？

香：揀股講理性，可揀多隻，有不妥就要止蝕；但揀伴侶則講感覺，只可揀一個，有缺點要學識包容，難作比較喎。不過，眾所周知炒股要平衡風險及回報，拍拖亦是，正如與富二代約會的回報高，但又能否承擔其拈花惹草的風險？相反與敦厚老實的男士，回報不高但安穩，或更開心！

蜜運小花：可同光國拍拖

高妹：睇見你就Sweet，「幸福」兩個字直情鑿咗喺額頭！

關：哈哈，我同男朋友開始咗幾個月，正處於熱戀期嘛。我哋係舊年去南韓自駕遊時認識，佢係我朋友嘅朋友，起初諗住多個「司機」，但期間發覺大家幾適合，無幾耐就一齊咗。雖則佢對投資認識不多，但我着重生活上的嗜好，放工後唔講市況，而係一齊做運動，仲輕鬆啦。況且我鍾意帶有孩子氣的男生，相處起來較舒服、開心呢。

高妹：金融小花在異性緣上有咩優勢？你曾否諗過在行內搵情人？

關：我覺得我哋普遍較獨立自主，不會對伴侶過分倚賴，較有自信及魅力，亦較受伴侶尊重。但講真，我冇諗過在行內搵對象，因大家是同行的話，生活圈子較窄，總離不開股市，相反行外人可帶來新鮮感，大家亦可互補不足！

高妹：好情人難找，值得付出感情的潛力股亦不易發掘！

關：我看好光大國際（00257），股民不妨付出三、四年的感情，因內地污染嚴重，環保產業續受注視，而光大國際旗下垃圾發電業務的前景可看高一線，正積極尋求增長動力，除與歐洲企業合作去提升技術水平外，亦自行研發多項技術減低成本，上周五股價升近4%。

點解「財俊」嫁得過？

究竟財金界才俊有幾吸引？孖妹在網上看到一篇文章列出嫁給炒股人士的七大理由：

一．能堅持炒股多年而不半途而廢，反映有恒心有毅力，感情專一；

二．能夠炒股賺錢，顯然頭腦靈活，有機會造福後代，將來的孩子較聰明；

三．見慣大市風浪，較成熟穩重；

四．擅於理財，可保家人衣食無憂；

五．在股市上花精力，不愛浪費時間，減少外出花天酒地的機會；

六．為儲錢投資，生活花費上會較節儉；

七．每天應對股市波幅亦不受影響，EQ較高。

資料來源：網上轉載文章

高妹、彩兒

若有料報畀高妹同彩兒或有嘢問，可電郵money.biz@opg.com.hk