Market Insight：環保概念長線睇好

股市大升，有兩個解讀方向，一是近日環球金融市場飽受聯儲局退市陰霾左右，道指由去年底歷史高位16,588點，到上周低位15,340點累跌近7.5%，非農職位達唔到支持經濟復甦的每月20萬個，使投資者揣測新一任聯儲局主席耶倫可能要停低考慮，退市是持續進行，抑或等就業市場有更強的回暖才再修正壓低長債孳息的力度。當晚美國十年期債息由2.7厘最低落過2.63厘，最後收2.68厘，多少反映美元長期利息，有機會在3厘附近中短期見頂。

芬佬取態較為關鍵

另一個可能性，是同日公布的美國私人企業增聘情況比預期好，有18.5萬個高於預期的14.2萬，可見北美惡劣天氣僅延緩了企業招請人手步伐，就業市場景氣尚算合格。姑勿論點，兩個睇法同樣利好美股，但對於憂慮美國退市，近日熱錢流出新興市場且衝擊經濟，不斷提款回流歐美股市的基金睇法，相信會有截然不同反應，如抱前者睇法的人較多，或者新興市場短期會有一個較似樣的反彈。

放大圖片

放大圖片

話時話，伯老雖然未將美國失業率，恢復到金融海嘯前的舊觀，不過道指及標普兩大股市指數被伯老大水喉狂谷，雙雙破頂，更估唔到係樓市，紐約無乜點跌過唔在講，洛杉磯、三藩市兩個西岸城市，去年樓價先後升穿○七、○八年海嘯高位。

古勝覺得奇怪，去年五月伯老暗示退市，美國按揭息也隨之見底，斷估美樓市點都要抖抖，結果樓價卻愈升愈有，有個專門幫人隔山買牛的老友話，美國本土人即使對樓市信心好番，但歸根究柢，美樓市興合合，同內地同胞的現兜兜掃樓團有關。

上述兩個西岸城市之外，倫敦及加拿大溫哥華都有唔少來自內地的特快成交cash deal，仲至少佔盤源的兩至三成。聽到呢度，想起有人講過，任何被十三億同胞睇中的都會搶貴，果然，茶葉同紅酒之後，美英加樓盤都係咁，諷刺係，佢哋偏偏對A股無興趣。

光伏板塊重新發力

講番個市，今日估計恒指開市至少見21,700至21,800點，22,222點重要技術阻力前，其實上面壓力唔大，反而可以追邊一類股份有啲考起。上周四、五個市反彈，查實無乜焦點，再退後一步睇，中信21世紀（00241）借殼夢碎，加速回歸平淡，可能其他網絡股都要抖一抖。二月春節期間博彩收入公布前，基金重新上車炒番濠賭股上去的機會亦都唔大，心水係燃氣及新能源股，前者早排跌得少，穩陣得嚟大家又嫌佢爆炸力唔夠，新能源股中，光伏股最有睇頭。

上月國家能源局定調，今年光伏電站裝機容量目標由原先的12吉瓦，提高至14吉瓦，比一三年足足多五成高於預期，可惜當時氣氛唔就，直到上周四、五先見領袖股保利協鑫（03800）報復式反彈，兩日升11%，礙於對佢有心理陰影，看官自己決定揀佢定揀其他幾件未多起步，仲響低位的光伏股。

最後要提環保股，市場睇住內地嚴重污染及霧霾天氣，中央政策傾斜，商機定必優於出口、零售等受經濟增長放緩影響行業，亦因為咁，在近期跌浪中，調整幅度有限，好似去年十二月中配股集資37億元的光大國際（00257），早前股價跌至9.41元經已跌唔落，同配股價8.52元有段距離。當然，同上次批股單是RRJ一個基金接近七成貨源，街貨極歸邊都有啲關係。

光國股價貴得有理

光國準備透過將水務生意注入新加坡上市的漢科進行重組，污水處理涉及長期的特許經營，資本需求高投資回報期長，考慮項目開始成熟，透過隻殼將財務獨立，對光國轉攻其他增長更快項目，例如垃圾發電有很大幫助。

光國預測一四年PE 26.7倍，但自一二年中起，一直高企在19至33倍，以今明兩年盈利增長預測26%及22%，現價不能說是便宜，但在股市兩極化，少數有美麗故事配合的股份估值愈來愈高的趨勢下，近日見股價守穩50日線再發力，估計中短期內都會維持強勢。

古勝