人稱「堅叔」嘅會德豐地產主席梁志堅，一向喺地產行內德高望重，絲絲尋日問起佢置業心得。原來堅叔28歲仔已經喺跑馬地買第一層樓，真係好堅呀，唔知同佢第一份工已經做地產有冇關係呢？
堅叔話，早於六十年代，佢因為結婚而上車買樓，當時28歲，第一層樓位於跑馬地宏德街，面積700多方呎，屬兩房間隔二手樓。約十年後，因為有小朋友而換樓，換咗層位於西半山干德道由合和（00054）起嘅樓，屬四房大單位，當時樓價只需40多萬元。
正當絲絲驚嘆堅叔可以喺豪宅區上車兼換樓之時，佢自爆人生第一份工已經同親戚一齊做地產，當時一腳踢要買地、賣樓同巡地盤等等，初出道人工已好過警察，當時警察月薪約370多元。
咁即係堅叔好專一，由頭到尾都係做地產，佢個朵唔係浪得虛名，依家仲係地產建設商會執委會主席添。堅叔啱啱由南韓旅遊回港，就參加會德豐（00020）嘅團拜，心情大好，繼續保持有問必答嘅親民作風，樓市前景呢啲較嚴肅問題必答之外，連置業歷史都公諸同好。
余絲韻