獲提名為聯儲局副主席嘅以色列央行前行長費希爾，喺財金界德高望重就眾所周知，但原來佢身家都好豐厚。等緊參議院確認提名嘅費希爾披露坐擁1,460萬至5,630萬元（美元‧下同）資產，唔止多過主席耶倫早前披露嘅480萬至1,330萬元身家好多，仲隨時成為最「疊水」聯儲局官員。
目前，聯儲局內最「疊水」者，係理事鮑威爾，佢身家超過2,000萬元。至於費希爾嘅仕途生涯以擔任學者同埋政府工作為主，○二年至○五年期間曾任職花旗副主席，亦曾擔任國際貨幣基金組織（IMF）第一副總裁七年。佢最值錢嘅單一資產，要數位於紐約嘅住宅物業，價值500萬至2,500萬元（約3,900萬至1.95億港元）。
費希爾承諾，若獲確認成為聯儲局副主席，將會沽出多家金融機構持股，包括美國運通和貝萊德，佢老婆亦會出售巴郡、通用電氣（GE）、美國運通同埋萬事達卡嘅股票。
計絲絲話，費希爾咁做無可厚非，畢竟聯儲局負責監管關係到金融體系穩健嘅銀行控股公司同金融機構，劃清界線好啲。
可以肯定嘅係，費希爾坐上聯儲局第二把交椅呼聲甚高，市場都好期待費希爾同耶倫呢對夢幻新組合嘅表現。
參議院銀行委員會計劃喺呢個月最後一周召開聽證會，考慮係咪確認費希爾嘅提名，到時會考慮埋鮑威爾續任理事，同埋前副財長布雷納德嘅理事提名。
余絲韻