絲絲講場：滙豐高層落區拜年打氣
新正頭銀行打開門做生意，梗係希望攞番個好意頭，滙豐管理層尋日落分行拜年打氣，大頭佛、舞獅、財神出齊，仲同老客戶傾下偈、飲下茶，派利是更加唔少得，嚟緊幾日仲會繼續落分行，應該都會派利是派到手軟。
員工應節服裝助興
滙豐香港區總裁馮婉眉（Anita）、香港區零售銀行及財富管理業務主管施穎茵（Diana）同零售網絡主管韓克強（Andy）初六帶隊，落咗銅鑼灣百德新街分行，向分行員工同客戶拜年。
滙豐請咗啲老客戶一齊去分行，順便傾吓偈，而且員工又換裝紅彤彤應節，男嘅着唐裝、女嘅着小鳳仙，加埋兩隻醒獅助興，而其他分行嘅主管都有嚟，場面認真熱鬧。
絲絲記得Diana同Andy年年都會落主要大型分行拜年，但滙豐咁多分行實去唔晒啦，不過間間大型分行都咁多人，呢幾日肯定派利是派到手軟。