絲絲講場：新股女王 愛上老恆和
新正頭未過，好快又到元宵同埋西方情人節，試問有邊個女士唔鍾意玫瑰花？有「新股女王」之稱嘅中央證券登記董事總經理鍾絳虹相信都唔例外。
盛讚腐乳陳醋特別
話說早前去咗佢有份協助上市嘅「百年老店」老恒和（02226）嘅上市晚宴，一試老恒和嘅腐乳同陳醋，就立刻愛上，原來佢哋啲腐乳係用特選嘅玫瑰花嚟製造，帶有淡淡玫瑰花味，而玫瑰陳醋亦都係天然釀造，呈玫瑰顏色。嘩！啲食品可以好似玫瑰咁精緻，難怪「新股女王」一見鍾情！
鍾絳虹話，食物始終係最容易令人開心同有趣味，所以佢覺得協助老恒和上市，比幫其他公司上市來得好玩。
鍾絳虹助百企業上市
多年來，鍾絳虹幫過逾百間公司上市，可以話有乜嘢行業未見過！唯獨精緻講究食品最得到女王歡心。
既然佢大讚「百年老店」嘅玫瑰腐乳及陳醋了得，老恒和不如諗吓搵「新股女王」做代言人，可能會吸引到好多散戶買佢哋啲產品。事關鍾絳虹成日教啲散戶點樣供股、抽新股等，散戶對佢好熟悉呢！
余絲韻