Market Insight：避險板塊具抗跌力

內地A股放緊年假期間，國指及恒指兩個交易日累積跌348點及766點，或3.5%及3.5%。聽日A股開波，如果跟足跌幅，睇怕蛇年埋齋報2,033點的滬綜指，好大機會兩千點關口不保。

繼大鱷索羅斯話今年全球經濟不確定性來自中國之後，隔晚美國太平洋投資管理（Pimco）投資總監兼有「債王」之稱的格羅斯，接受訪問都對中國踩多兩腳，認為內地經濟狀況難以辨清，令投資市場不安程度增加，反而對最安全投資需求有所裨益，或者有人認為債王只係想曲線為去年錄得破紀錄淨贖回的TTF基金兜生意，不過多個名嘴不約而同唱淡中國，睇怕短期內A股都好難有運行。

強勢股先後見頂

去年底，古勝已提過大幅偏離整體大市估值的科網及濠賭股，股友只能抱住先訂止蝕、炒到爆預輸番尾注畀佢心態入市，依家兩個最有故事配合的強勢板塊，都先後呈見頂迹象，今年初仲有乜股好炒？確實是有點費煞思量。

古勝冇點你 2014/02/06

萬里長空

近期美國經濟數據並非十分理想，伯南克上月底最後一次主持的聯儲局議息會議，依然再減100億美元每月買債規模，到底是對美國就業市場後向信心十足，抑或純粹想連續兩次tapering，畀市場更大訊息，退市唔理會短期經濟起伏都會循序漸進推行？

不過，筆者見十年期美債息由高位3.02厘回落至隔晚2.62厘，多多少少反映市場預視聯儲局正開始為龐大流動性打修正球之後，美國經濟增長可能減慢的共識。

大孖沙計數心切

有趣是，假如中短期美債息在3厘見頂，配合跌市資金回流防守性股份的傳統，理應去年下半年，跌得極傷的高息股會有迴旋之力，可是香港嘅「兩電一煤」股價依然弱勢未興（或者同民粹下，一八年前再傾利潤管制協議壓力增加有關），連領匯（00823）今年仲要跌多8%，若非股市同債市對息口趨向睇法唔同，那多少反映出今浪當港股提款的大孖沙，的確有點計數心切。

如果聽日復市A股唔係預期咁世界末日的話，同時當晚公布的一月美國非農就業職位增長又唔係強到去分析師所預測的18.4萬個，下星期個市亦有條件先嚟一次技術反彈。

早兩星期，因阿里巴巴入主嘅消息，股價翻幾番的中信21世紀（00241），昨日阿里巴巴財務副總裁任秉正，話有關交易仍未完成，亦無意注入業務變相借殼上市，消息一出股價急挫8.5%，收報3.44元，不過仲係比交易消息公布前的0.83元，高出314%，計及發新股全面攤薄後市值近280億元，以及低於20億元的股東資金，如果注資只是得個講字，單憑馬雲兩個字，值唔值得用十幾倍溢價去捧場，看官自己去衡量。

公路股相對硬淨

想搵避險嘅板塊，除咗偏強的手機股之外，也許以內地為主要市場、以人仔為主要收入貨幣、具穩定收益來源的中資公路股，亦具備一定的抗跌能力。

至於表現較硬淨的有江蘇寧滬（00177），昨日股價曾高見9.42元，最後收報9.22元，逆市微升0.2%；深圳高速（00548）股價則無升跌，最後收報3.45元，兩者股價表現亦強於四川成渝（00107）以及浙江滬杭甬（00576）。

不過，滬杭甬亦非毫無留意價值，事關公司早已為分拆內地券商業務上市作準備，A股既已重啟IPO，若今年順利分拆券商業務在A股上市，將有助釋放資產價值，股價回落至6.5元樓下，估值現吸引力。

古勝