違規罰錢兼要集資
放棄花紅，講就容易，真係實行嘅，詹金斯可能係少數嘅一位。唔拎花紅嘅原因好簡單，因為巴克萊違反監管條例而被罰錢，早排又向股東集資58億英鎊。
詹金斯話，雖然自己有份帶領銀行面對種種困難，而且資產負債表又有顯著改善，不過，近排關於巴克萊嘅負面新聞實在係唔少，作為銀行嘅掌舵人，一日唔搞掂呢啲問題，佢都唔會拎花紅喎！
其實，舊年點止巴克萊一間銀行要交罰款，單係匯控（00005）、渣打集團（02888），就已經畀負面新聞纏身，唔知兩位CEO會唔會倣效詹金斯呢？
唔講唔知，滙控行政總裁歐智華一二年花紅達195萬英鎊，渣打行政總裁冼博德當年嘅花紅就315萬美元。
余絲韻