絲絲講場:美聯提振士氣「有一手」

各位打工仔新正頭開工嗰日,最想逗到老闆封開工利是,唔係貪錢,係要攞個意頭啫。好似美聯集團(01200)同埋花旗銀行派開工利是,就好有氣氛喇,士氣即刻提升!

美聯集團「鐵三角」管理層──主席黃建業、副主席黃靜怡同埋董事總經理黃子華一馬當先,向前線同後勤員工大派開工利是。黃建業囑咐員工「一年之計在於春」,馬年乃新盤天下,「得一手、得天下」,要贏盡商機,就要時刻保持「鞍不離馬背,甲不離將身」嘅作戰狀態,方能喺千載難逢嘅「一手年」裏面跨越藩籬、長驅直進,業績一躍千里。

至於花旗銀行,佢哋環球個人銀行服務香港區市務總監吳詩雅,喺尋日銀行都未開門之時,就帶埋財神去彌敦道分行嚟個迎春接福,祝福各位生意興隆、新一年萬事大吉。

花旗員工「接財神」

一早返到公司又有利是,又有金元寶,仲有得「接財神」,今年想唔行大運都難,令成班員工鬼咁Happy。

之後佢再去其他分行,等多啲同事感受公司嘅貼心,財神爺就轉戰鰂魚涌後勤Office,一路由5樓派利是派到13樓,巡足9層,保證人人有得「接財神」,個個都工作順利。

余絲韻