絲絲講場：騰訊開工利是親手派
騰訊（00700）旗下微信「搶紅包」突圍，依家發放電子紅包成為內地最具人氣嘅派利是方式，但騰訊主席馬化騰，似乎無意用呢個人氣派利是功能向自己員工拜年。
馬化騰愛與員工交流
絲絲八到，馬化騰同總裁劉熾平等騰訊管理層，將會一如過往在公司開市首日（本周五，年初八）上午，親自向員工拜年兼大派利是，騰訊知名嘅「利是長龍」，唔會因「搶紅包」嘅出現而成為歷史。
點解馬化騰同劉熾平，堅持自己派利是呢？除咗因為馬化騰嘅一份堅持外，開市派利是係唔少騰訊前線員工，同馬化騰直接碰面甚至拍照嘅最佳機會，咁親切嘅交流機會，又點可以隨便改變呢？
「利是長龍」成IT佳話
其實呢個傳統，早喺騰訊初創階段已開始，據講馬化騰當年已習慣喺農曆新年後嘅首個開市日，親自行去同事個位派利是，以表達對員工嘅謝意。隨住騰訊日益壯大，馬化騰雖將派利是嘅地點改到自己辦公室門口，但仍堅持親自為員工送上利是。
舊年馬化騰親手向員工派發超過5,000封利是，搞到騰訊深圳總部出現由頂樓排到地下嘅利是長龍，成為內地IT界嘅一時佳話。
余絲韻