為咗娶個好老婆，你可以去到幾盡？聯想集團（00992）似乎為咗證明自己嘅誠意，應承一旦「婚約」得唔到外父大人嘅祝福，就畀多一倍半「分手費」。
話說聯想早前公布，有意收購國際商業機器（IBM）嘅x86伺服器硬件及維護服務業務，但尋日外電有報道就話IBM要求一個高於平常嘅分手費，仲話如果聯想唔應承，就會轉頭同日本嘅富士通（Fujitsu）傾咁話喎。
聯想喺呢個情況下，為咗贏得美人歸，即使明知呢個要求會令交易風險大增，都一口應承咗。究竟IBM嘅要求有幾高？
原來IBM要求，即使交易過唔到美國監管部門而告吹，聯想都要畀交易總金額23億美元嘅8至9%做「分手費」（即最多約16.15億港元），係正常3.5%嘅兩倍半有多。
絲絲心諗，「娶老婆」（收購合併）搞到畀人「打劫」咁，睇嚟聯想真係情人眼裏出西施，惟有祝佢幸福啦！
余絲韻