呢排收到唔少新年賀卡，尋日收到滙控（00005）集團主席范智廉寄嚟嘅賀卡，紅噹噹嘅卡，仲有范智廉逐張逐張簽名o架，幾窩心呀！亦凸顯滙控領導層嘅「地方智慧」。
絲絲諗返「獅子銀行」三年前歷史性舉行策略日嘅盛事，當時滙控亦有邀請香港傳媒到英國倫敦採訪，自此之後，范智廉都有Keep住寄發附有親筆簽名嘅賀卡。
可惜大鑼大鼓搞咗策略日之後，滙控呢兩、三年嘅業績表現唔算標青，股價浮浮沉沉，一直停留喺80蚊左右水平。滙控喺二月底公布一三年全年業績，如果業績表現理想，令股價好似賀卡嘅顏色咁，盡快重返「紅底股」行列，相信係好多小股民嘅心願。
講開獅子銀行，旗下嘅恒生銀行（00011）尋日公布，滙豐香港區總裁馮婉眉（Anita）將會退任恒生非執行董事一職，以應付滙豐集團日益繁重嘅職務。另外，恒生零售銀行及財富管理業務主管陳力生獲委任為恒生嘅執行董事，同樣由明起生效。
余絲韻