復星集團舊年喺國際市場動作頻頻，投資金額數以百億元計，不過近年科網盛行，騰訊（00700）老闆馬化騰、阿里巴巴老闆馬雲已經係宇宙最強，絲絲聽聞，一向自信嘅復星集團董事長郭廣昌，喺集團今年嘅全球工作會議講話時都話，仲未有自信可以搵到條路超越呢兩位強人，但係同由馬明哲揸Fit嘅平保（02318）比呢，佢話復星係有希望嘅。
復星近年着力推進全球化投資，舊年進行咗多個收購，包括美國知名女性時裝奢侈品牌St.John、專注於個性化藥物劑量診斷化驗的美國Saladax公司。
有內地傳媒就引述數據指，復星舊年全年投資咗101個項目，實際投資金額超過300億元人仔，投資地區包括美國、英國、日本、以色列、意大利、法國、希臘、馬來西亞等多個地方。
對於今年復星嘅發展，郭廣昌喺會上講，「要加快全球投資能力建設」，至於有咩具體嘅投資機會，郭廣昌就話，主要關注產業洗牌，包括鋼鐵、能源、國有企業改革、金融業，以及消費升級同埋城市升級帶嚟嘅機會。
另外，近期受霧霾困擾，復星又將「大環保」納入投資重點。
余絲韻