絲絲講場：萬邦股東會順便團年

老牌股萬邦投資（00158）尋日搞股東會，作為萬邦執董嘅新世界發展（00017）創辦人鄭裕彤今年再度缺席，但依舊有一大班長情股東捧場，因為公司相當有人情味，在中環翠亨邨開完股東會，就會依舊擺幾圍答謝股東支持，仲有豬手、盆菜等賀年菜，讓股東們慢慢歎餐團年飯。

彤叔上年已因住院留醫而缺席萬邦股東會，絲絲尋日諗住趁機關心下彤叔近況，可惜彤叔並無出席，連執董鍾賢書都話，唔知彤叔缺席原因，又話「好耐冇見彤叔」，所以唔多知彤叔現時嘅健康狀況。彤叔姪仔鄭錦標作為股東會嘉賓，開完會就好快離開。　

不過，萬邦依舊深得股東支持，不少長者股民於會後更趁機敍舊。查實萬邦董事嘅資歷真係好豐厚，睇返公司年報，最「後生」嘅執行董事，都有69歲，最老嘅93歲，非執董有個後生啲，65歲，唔怪得一班老股東，笑言大家都算一起成長，所以唔會賣萬邦啲股票咁話。

余絲韻