Portwood Capital主席卓百德（Peter Churchouse）係帆船賽常客，最近佢就分享番有一次喺菲律賓比賽完後，畀一隊軍隊劫持嘅驚險旅程，最後係一個「百寶袋」救返佢條命。
話說都好幾年前，卓百德同隊友賽完菲律賓嘅帆船賽後，全隊人繼續坐帆船去觀光，就選擇咗菲律賓一個十六世紀由西班牙人開發嘅島嶼。點知駛到目的地上岸後冇幾耐，全隊六個人就被一隊揸槍嘅軍人圍住，盤問佢哋係咩人？點解喺呢度出現？有冇手令等等一大堆問題。
卓百德就估對方應該想要錢，就好婉轉咁問：「係咪我哋有啲本地稅未交呀？」點知對方長官又唔表態，淨係將佢地押去一間房等候發落。全船人一心上岸尋歡，個個兩手揈揈，惟獨卓百德因為細細個受童軍訓練熏陶，知道要時時做好準備，所以每次遠行都會隨身會帶住個「百寶袋」，內有少量各地貨幣、卡片、電筒、銀行資料、藥用品、手提電話等。
卓百德即刻遍尋今次帆船賽期間，同人交換嘅卡片有邊張啱用。卒之畀佢搵到當地省長電話，就即刻用手機求救，雖然電話未能直接聯絡到省長，但就向省長助手講低佢哋嘅求救訊息。終於個幾鐘頭之後，有一個當地市長嘅姐姐嚟帶佢哋離開。
佢話，投資如做人都需要有「百寶袋」，而投資嘅百寶袋，佢就建議入面要有人壽保險、房地產、現金、黃金，證券要有防守性嘅組合，包括房託基金、公用事務、債券等，最後仲要唔怕大吉利是，立好遺囑講明財產分配，就萬無一失啦。
余絲韻