「假金牛」全城肆虐，不過，港交所（00388）就無懼「假金牛」，今個馬年港股開市儀式，「財神」港交所主席周松崗、同行政總裁李小加，會照向出市員派出十封一千元大利是！由於出市員數目近年買少見少，抽中利是特別大獎嘅機會大增，出市員真係等住過肥年！
聽聞港交所現時仲未去銀行「唱錢」派利是，所以未知「金牛」利是係兩張500元定係一張1,000元，但照絲絲睇，港交所一向重視「風險管理」，派出嘅「千元」利是，一定係經過銀行兌換，肯定係真嘢，抽中大利是嘅出市員應該唔使擔心，開開心心過年！
雖然港股今年成交普普通通，但港交所業務基本上都係「坐喺度收錢」，之不過，港交所派畀出市員嘅利是今年唔會「加碼」，照舊係10封1,000元、20封500元、同埋大部分50元。
不過，由於出市員「沒有最少，只有更少」，由往時一百個，得番五、六十個左右，喺「僧少粥多」情況下，抽中大利是嘅機會自然增加。
絲絲數數手指，假設年初五開市日，有100個出市員出席，但共有30封特別版利是，抽中機會分分鐘易過依家啲熱爆新股。
記得年前就試過有出市員連續收到兩封大利是，笑到見牙唔見眼。啲經紀最講意頭，新年流流就連中兩元，嗰年仲唔發到變豬頭！
余絲韻