炒股炒錯隔籬嘅事件時有聽聞，最近一單都幾誇張，誤中副車嘅股票大升19倍，接錯貨又冇放嘅朋友真係喊都無謂。
呢兩年成為收購王嘅Google，早兩日宣布收購智能家居設備商Nest Labs，而另一隻代號「NEST」嘅仙股Nestor，忽然畀投資者狂買，股價好似食咗興奮劑咁，全日高位升咗49倍，收市時都唔弱，一夜間爆升19倍，到翌日就跌返五成。
Nestor專門為美國公營部門提供自動交通執法系統服務，真命天子Nest Labs，其實係智能恒溫器生產商。Nestor畀股民點錯相已經唔係第一次，上年十月喺Twitter，有人傳出Google可能買起Nest Labs嗰陣，Nestor股價曾爆上11美仙。
另一次搞笑炒錯股事件，非Twitter莫屬，同樣係上年十月，代號「TWTR」嘅Twitter仲未上市，班股民已經興奮到連代號「TWTRQ」、○七年申請咗破產嘅電子零售商Tweeter都炒起，後者股價一度狂飆22倍！
余絲韻