富豪點使錢，完全係經濟同國情變化指標，特別係內地，睇吓一年一度公布嘅《中國千萬富豪品牌傾向報告》就知，報告話，富豪送禮比對上一年減少25%，佢哋自己嘅平均消費都縮咗15%。以心頭好劃分，原來古代字畫已經取代手錶成為千萬富豪收藏首選，億萬富豪就繼續鍾情手錶。
富豪使少咗，不外乎中國經濟增速放緩、政府反腐倡廉工作，同埋中國奢侈品消費者日漸成熟等因素。胡潤百富董事長兼首席調研員胡潤話，中國富豪冇前幾年消費咁狼，佢哋理性同成熟咗，更加關心自己嘅風格，以及品牌嘅文化同背後嘅製作工藝。
絲絲好有興趣，富豪送禮會揀啲乜？原來Apple係送禮品牌中唯一嘅電子產品，並且保持男士送禮品牌第二。
LV告別男士送禮品牌第一嘅寶座，由上升兩位嘅Hermès取代。女士送禮品牌冠軍仍係Chanel。茅台仍然係唯一上榜嘅中國品牌，但排名比去年跌一位。
唔知係咪經濟差咗，佢哋錢就使少咗，工作就忙咗，出差多咗7%，達到每月8天；休閒時間少20%，除國家法定假日外，只有7.5天假期。
胡潤亦睇到內地富豪嘅另一特點：「我認為中國富豪心裏有一個矛盾，對外喜歡低調，但很難解釋全球買勞斯萊斯和高檔手錶最多的也是中國富豪。」
以投資工具計，房地產係富豪投資首選，股票居第二，但投資股票嘅億萬富豪比千萬富豪少一半，億萬富豪投資藝術品同另類投資較多。
「胡潤富豪經濟信心指數」五年來首次上升，每十位富豪就有3位對經濟好有信心。齋睇指數，可唔可以理解為，佢哋嚟緊會使多啲錢呢？
余絲韻