絲絲講場：Bitcoin「國情」拍得住北韓

1%人持八成貨

花旗貨幣分師師恩蘭德最近根據芬蘭企業家皮耶蒂萊上個月嘅統計推算，喺Bitcoin世界裏面，0.1%嘅人擁有50% Bitcoin，1%人掌握80% Bitcoin，呢個比率，同帕雷托（Pareto）法則，又稱二八定律，真係差好遠！

恩蘭德指，Bitcoin世界貧富懸殊之所以咁得人驚，可能係同市場最近憧憬Bitcoin嘅應用日漸廣泛，觸發Bitcoin身價急升有關。試諗吓，Bitcoin由○八年低調面世，一路去到舊年年頭都被視為異端，吸引唔到資金流入，幾年前率先默默開採Bitcoin嘅人，咪自然受惠最大囉。

其實呢個現象並非Bitcoin獨有，另一種虛擬貨幣Litecoin都差唔多。不過點都好，Bitcoin忠實擁躉推廣Bitcoin應用嘅努力從未停止過。

亞馬遜勢跟風認受

話說美國網購平台Overstock上個禮拜四開始接受Bitcoin，開創當地主流零售商先河。

身為Bitcoin信徒嘅Overstock行政總裁伯恩宣稱，首日以Bitcoin計價嘅訂單已高達13萬美元，仲牙擦到批死同行亞馬遜遲早都要收Bitcoin，因為網購市場每個月以30%嘅高速增長，亞馬遜無理由蠢到唔收Bitcoin，放棄咁大舊肥豬肉喎！

余絲韻