Market Insight：手機股仍然值博

睇番恒指10日、20日及50日線經落到去22,962、23,023及23,261點，250日線升到上22,603點，即使話，後市一旦升四百或跌三百，已經足以破晒幾條主要平均線阻力或支持。半杯水亦可以話，經過超過一季牛皮，平均線纏埋幾百點內，即使後市突破，破位引發好（淡）友冚倉力量都唔會好大，單邊市力度可能得小兒科嗰隻。

話就話一二、一三年，是美國海嘯以來，大市波幅最窄的一年，不過閣下手上如果揸住博彩、網股、環保及新能源，贏到開巷當然另作別論。話時話，另外唔多起眼的，係唔少仙股毫子股炒到飛起，舊年升十倍以上的股票都有6隻之多（最勁的新確科技（01063）升咗18倍！），有幾倍升幅的更多不勝數。

古勝冇點你 2014/01/14

萬里長空

股仔井噴升有古仔

早幾日古勝聽賓架老友講，特區政府儘管已叫停買物業的投資移民，但投資十球（1,000萬）金融資產（一○年前係600萬）搞投資移民，依然深得內地同胞歡迎。有投資公司睇中呢點，專門兜呢一類客貪放錢入嚟坐七年好少郁，搵啲友好三四線，夾手夾腳轉倉畀班移民客戶，坐乾街貨後炒上去無人攔路。

近一年唔少股仔一炒無回頭，井噴式爆升完街外都未知原因，唔少就係呢類操作咁話，不過大部分股民同在下呢類非內幕人士，都只係得個睇字。

手遊股升到唔肯停，「三寶」IGG（08002）、雲遊控股（00484）及博雅互動（00434）統統做好，博雅仲創埋14.88元上市新高，但明顯資金開始流向其他有些少概念的股份，有周董為旗下網站Ucan.com代言的文化傳信（00343），昨升15.1%收報1.67元，連埋上周五，兩日已經升咗逾三成夠晒誇張。印象中Ucan.com距離首次發布快將一年半，但昨日上網一睇，仲係得網站簡介未見傳說中的虛擬城市，見到咁，隱隱然感到呢一浪網股可能真係需要抖抖氣。

酷派晒士細諗得過

早幾日，馬化騰話手機經已成為人類的電子器官，事實依家唔帶手機出街，真係有多少不安感覺。一來蘋果公司及三星唔爭氣；二來Android平台下大家起跑線拉近咗，近年內地生產商愈戰愈勇，聲勢強勁的小米，今年的銷售目標達4,000萬部，比一三年翻一番。聯想集團（00992）估計今年智能手機銷量去到5,000萬部，比去年升六成六。

啱啱跟番產品個品牌，由中國無線改名的酷派集團（02369），在早幾日科技產品發布會2014 CES發布今年推的15款4G手機，並預計連同3G機，出貨量達6,000萬部，估計比一三年至少多七成。

姑且唔理手機生意可以賺到幾多錢，睇三間公司，昨日聯想市值992億元，小米半年前引資時估值100億美金，即780億港元，酷派市值得69億元，得聯想十四分一及小米十一分之一，如果酷派無開空頭支票，可能最值博會係佢，難怪CES發布會後，呢幾日炒到出煙。

油服股安東較可取

油服股昨日再有異動，TSC集團（00206）急升11%、巨濤海洋（03303）升8.6%、安東油服（03337）升6%，宏華集團（00196）亦升7%，反觀中海油服（02883）就低收2.9%。去年頁岩氣股熱炒時，安東和宏華為炒家至愛，惟由於行業發展稍慢，加上業績失色，其後兩者現整固，其中宏華表現相信令不少捧場客失望。

論走勢，本月以來，安東交投轉趨活躍，昨日股價高位5.92元，創六個多月高位，收報5.82元，升6.2%，既以大成交打破大半年的悶局，短線有力再向上衝，目標反覆向52周高位6.87元推進。

至於近年表現明顯落後於同類股的宏華，本月以來守穩過去半年的支持區2.1元下作出反彈，惟若未能突破50日線2.56元，不排除反彈完成後要再試平台支持。二選一，還是安東較為可取。

古勝