孖妹S檔案︰股民睇價值盛股愛長揸

Clay：睇中宏利潛力高

長揸唔代表保守！例如滙控（00005）、長實（00001）市值大、背景強，買佢哋有穩定回報。最長試過揸宏利（00945），當時佢走勢好慢，被迫要擺喺度唔放，但我覺得佢潛質好，所以就揸咗兩、三年。另外都長揸緊中信証券（06030），因為我睇好內地證券、投資銀行、新股上市、配股集資業務。

張生：騰訊上市揸到今無幾人

依家有邊隻股票可以揸一輩子！我哋日日坐喺證券行望住股價，若能有10%的升幅，已賺到笑呵呵即刻沽貨，利字當頭，有幾多人可抵擋誘惑，由3.5元買入騰訊（00700）揸到現時近500元呀？！

Clay	張生	王女士

王女士：工行愈跌愈要買

我以前炒股輸過唔少錢，不少股票擺到變蟹貨，有時又太早沽貨，就好似江西銅業（00358），當時僅用1.22元買入，可惜太早離場，如果揸到依家就大賺啦。現我多數買入內銀股，雖然股價表現麻麻，但穩陣得嚟有息收，輸極有個譜！目前已持有工行（01398），若再跌就再入貨。

鄭生	蔡生	Rita

鄭生：內銀蟹貨收息抵

有不少股份係焗住長揸，如○二年買入長江生命科技（00775）到依家隻股票仲未返家鄉！另往年買入建行（00939）及工行變成蟹貨，都仲閘住咗，但一年有成萬蚊利息，咁就唔怕長揸！

陳生	梁小姐	王昕媛

蔡生：買盈富揸晒藍籌

幾千至一萬左右嘅錢，我多數短炒，大數目嘅錢就會長揸。以前試過成副身家過百萬買滙控，揸咗五年，到金融海嘯輸咗十幾萬，之後就轉咗買盈富基金（02800），見佢全部大藍籌，所以揸咗五年。另外和黃（00013）、長實都分別揸咗三、四年。

Rita：睇好六福實力夠

我以前都有揸過滙控同中移，但畢竟時機已過，實難再勁升，故我於早年已將其賣出，寧把資金投放在強勢股。時移世易，投資趨勢已有所不同，不能用死一個方法，如長線的話可用巴菲特嘅揀股方法搵潛力股，再加上技術分析，如我在六福（00590）上市時已有所留意，數年來出入多次，近日雖受金價下跌影響，但終究是有實力的公司。

陳生：博滙控升返「紅底」

滙控依然係長線首選，我近排打算入貨，因其息率較高，加上去年已開始減持資產並增強現金流，盈利前景將轉佳，有望升返一百蚊水平呀！其實我之前有買入民生銀行（01988），同樣諗住係長線賺息，但近日股價愈睇愈唔對路。

梁小姐：新地等位再長揸

有多餘錢，當然買入大型藍籌股收息好過擺銀行，故幾年前已買入滙控、新地（00016），只是前排要資金周轉先至沽貨，正考慮再買入睇長線。另亦揸緊銀河證券（06881）及擎天軟件（01297），因看好其行業前景，值得長揸。

同股票「談戀愛」要計數

國泰君安國際（投資諮詢部）副總裁王昕媛認為：「巴菲特對可口可樂有一輩子的情意結，但對散戶而言，最好平常心！

我有長揸股票，但絕唔會死守，當見勢色唔對路，就要諗清楚係咩原因，到底是突發事件還是季節性因素，再決定應否止蝕。其實止蝕唔難，最難反而係面對升市應否止賺。不少股民賺少少就走人，後來見股價仲升又再高追，就連專業的基金經理亦犯同樣毛病！揀啱股票，就應該揸耐啲，但並非定要「一生一世」，而是理性分析潛力及風險。

股民可揀每個周期都有成長的股票，唔一定要高增長，最重要唔使蝕，如統一（00200）雖則息率唔高，卻有增長價值，政策風險亦低，加上公司管理質素甚佳，儘管面對康師傅（00322）的劇烈競爭，但內地食品市場相當龐大，料可共存做大個餅，不妨長揸。

（高妹） （彩兒）

若有料報畀高妹同彩兒或有嘢問，可電郵money.biz@opg.com.hk