係人都知，股壇長毛David Webb最鍾意踢爆上市公司董事嘅虛假學歷，上市公司董事無不「聞風喪膽」！
港交所（00388）尋日就出咗封指引信，講到明想要保薦人核實董事嘅大學認證。睇嚟，上市公司董事第日喺招股書「亂吹」自己學歷應該可以杜絕！
一般來說，招股書披露董事資料時，會包括其學歷背景，例如經獲授權認證組織認可嘅大學或學院名稱。港交所封指引信就話，當上市文件披露個別人士嘅學歷認證時，港交所期望保薦人會檢查有關學歷認證組織，係咪獲授權給予認證嘅機構。否則，保薦人應建議新股申請人從上市文件中刪去有關學歷認證組織嘅提述，或者披露該學歷認證組織，並無獲授權進行認證。
同時，保薦人亦要確認有關課程係咪遙距學習課程或者網上課程，如果係就要在上市文件中列明。
港交所咁樣做，對小股民當然係好事，唔會咁易畀人「老點」，但保薦人就要做多咗工夫喇！
余絲韻