絲絲講場：阿里花紅 派贏騰訊
舊年內地科網概念熱爆，見到公司業績理想、股價飆升，各互聯網公司老闆都好識做，大派花紅獎勵返員工過去一年嘅努力。近日內地微信朋友圈流傳一篇題為《21家互聯網公司年終獎》嘅文章，詳細列出百度、騰訊（00700）、阿里巴巴等21間互聯網公司員工年終花紅，畀業內視為今年跳槽嘅指引明燈。
阿里同騰訊由社交軟件到手遊平台，喺過去一年真係鬥到難分難解，不過要講到對員工嘅慷慨程度，似乎阿里就略勝一籌喇。
出色員工獎9個月糧
根據呢份年終花紅總結，騰訊北京嘅部門一般係0至4個月花紅，平均大概係3個月左右，而對手阿里表現出色嘅員工聽聞可以獲派9個月Bonus，如果只攞到少過4個月，就應該屬於高危一族，有被炒危機。
而小米嘅花紅，雖然個個部門都唔同，不過大致上都係兩至三個月左右。不過有員工話，佢哋基本上每日冇十點鐘都唔使收工，果然係一分耕耘先至有一分收穫。
入職小米即送手機
互聯網公司雖然人工高福利好，但工作壓力都唔講得笑。不過，據聞新人一入職就會先獲派一個當紅嘅小米手機，算係咁啦！
余絲韻