Market Insight：內房股估值吸引

昨日啱啱講完話個市兩極化，股民可以選擇合埋眼訂止蝕衝入升咗唔少的新經濟股，或者守株待兔買基本因素唔錯兼估值超平的股份等運到，結果推介的中國建材（03323）升得0.9%，介紹過N次的手遊三寶IGG（08002）、博雅互動（00434）及雲遊控股（00484）股價勁升29.7%、30.6%及15.5%，就算定力再好，實在都好難做到坐懷不亂。

阿里騰訊埋身肉搏

手遊股炒到出煙，皆因IGG通告話其手機遊戲《城堡爭霸》落戶騰訊；另一邊廂，一宗顛覆手遊市場的消息，來自剛染指手遊平台的阿里巴巴。

古勝冇點你2014/01/09

萬里長空

傳統行規，平台與開發商九對一的分成比例，被急於搶市場的阿里巴巴所打破，宣布將給開發商的比例提升至八成，阿里巴巴保留兩成，當中一半仲會用作農村孩子教育發展計劃。

呢招七傷拳確係絕，肯定吸引更多開發商向呢個手遊初哥靠攏，兼直接衝擊對手騰訊的傳統分成模式。睇嚟兩個中國網絡土豪開始有埋身肉搏味道，估計戰場好快會由手遊燒到去視訊、即市通訊等市場上，一眾二三四五六線相關股份，估計炒風亦好快會進入高潮。

中國人口紅利告一段落，三中全會確認局部放寬一孩政策，奶粉股癲完一輪又靜番落嚟，不過賺細路仔錢的始終係寧捨吃香，以「紅孩兒」品牌專攻3至12歲小朋友的童裝品牌新股米格國際（01247），真正食正獨生子女多生政策加埋集資唔大，集資額約為3.7億元，順利趕及登上一三年超額王嘅第一位，超購1,125倍。

新股超購王多潛水

米格得唔得？老實講古勝無研究過，反而睇見米格躋身香港股市超購王第八位，排響佢前面，超購倍數介乎1,200至2,178倍的米蘭站（01150）、天津港（03382）、中國綠色食品（00904）、好孩子（01086）、琥珀能源（00090）、長興國際（00238）及北控（00392）的「超購七雄」，如果揸到今時今日，得北控一隻唔使潛水，最傷的長興比招股價跌七成，證明超額倍數同公司質素及上市後表現，無必然關係，至多反映孖展客認購成本特別貴係咁多。

瑞銀報告睇好內房，話綜合估值預期市盈率6.5倍及45%資產淨值折讓，去到26個月新低。查實內房股和啱啱講過的水泥股一樣，係估值超吸引，不過短期被基金經理忽視的抵買板塊。去年內房股大豐收，預期至少七間內房股售樓金額打入千億元俱樂部，因為賣樓套現金額比預期勁，綜合的負債比率亦由前年年底八成降至五成左右。

可惜的是，個市驚內地宏觀經濟唔明朗，以及憂慮中央再出招壓抑樓市，去年十月開始股價見頂兼跌定先，完全無視下半年，一個又一個月超強的銷售數字，好似去年首十一個月合約銷售額已達984億人仔，鐵定進身千億元俱樂部成員的恒大地產（03333），由去年十月高位跌23.7%，同去年初比較更累積跌39%，最近公司訂今年賣樓目標1,100億人仔，同悲觀的股市預期有極大落差。

世房升得有板有眼

昨日見內房成交確實好番唔少，看來開始引起春江鴨的注意，其中瑞銀睇好名單之一的世茂房地產（00813），前日掂完250日線即彈，個勢唔錯。世房去年十一月單月銷售升87.2%至57.17億人仔，使首十一個月累積合約銷售去到613億人仔升45%，比原先目標550億人仔多一成一。

去年大幅超額完成目標已成事實，大行預測世茂的一四年市盈率5.7倍（只及歷史平均估值一半），股息率5.2厘，係蔗渣價錢的平價選擇。

古勝