央視對地產商拖欠土地增值稅問題死咬唔放，最近再指控萬科欠交稅款超過四十四億元（人民幣‧下同），素有「任大炮」之稱嘅華遠地產董事長任志強即時喺微博發聲，力挺萬科，勁鬧「天下搵唔到比央視更蠢嘅豬」。
因為後尾有人留言，話央視只係黨同政府嘅喉舌，只管發聲，唔管思考，唔存在蠢唔蠢嘅問題，任總尋日虛心接納意見，將評語略作修正，改為「央視係尺，用來量豬」。
「土地增值稅」風波由二○一三年延燒到二○一四年，央視《每周質量報告》舊年十一月話發現45間上市房企欠繳3.8萬億元土地增值稅，引起地產商齊齊抗議，當時任大炮已經鬧爆央視「愚蠢同無知」。最近央視鍥而不捨，繼續對萬科死咬唔放，任志強當然係繼續力撐萬科啦。
不過，對於任總評批「央視豬咁蠢」，有學者評論，其實央視只係政府喉舌，只管發聲，唔管思考，暗示官方喉舌咁樣發炮，反映中央對發展商不滿，亦都有網友話，樓價狂升，發展商太過無良，就算央視報道有問題，發展商都唔見得咁乾淨。