智能產品都係夠平最實際，向來以產品性價比爭奪買家嘅小米頻頻出招，最近喺內地推出一款全新產品「小米隨身Wifi」，新年推廣售價9.9元人民幣（原價19.9元人民幣），體積僅2.7厘米，相當於一個一元硬幣般大小。
所謂「小米隨身Wifi」其實係一塊可以隨身攜帶嘅無線網絡卡，當然你可以認為佢係一個迷你Router，佢可以將自己電腦上嘅網絡變成一個Wifi熱點，從而畀周圍嘅朋友共用。據講呢個「小米隨身Wifi」喺內地首輪開售毋須預約，結果迅即售清，但香港就仲未有得賣！
相反，落足本錢嘅手機商黑莓銷售就冇起色，佢同樂壇天后Alicia Keys嘅合作關係，只係維持咗一年就玩完，終於宣布Keys將喺今個月底離任創意總監。
黑莓喺舊年呢個時候，推出用嚟打翻身戰嘅黑莓10手機，同時請Keys做創意總監，明眼人都睇得出，黑莓想用呢位天后級歌手宣傳新手機嘅意圖。
點知黑莓10手機嘅銷售成績未如理想，公司早前仲差啲要賣盤，Keys呢個創意總監做咗一年，雙方就宣告拆夥。可惜黑莓10手機嘅銷售表現平平，Keys點「唱」好都無能為力啦！