大家炒股通常會睇吓業績、股價走勢，又或者係聽吓市場消息咁，但又有無試過因為公司CEO嘅美貌而決定入市呢？
兩位美國威斯康辛大學嘅經濟學者最近刊登一份名為「美貌是財富」嘅論文，研究發現CEO嘅樣貌同公司投資回報係成正比，即係話如果老闆係俊男美女，就愈大機會為公司賺多啲錢！
其實類似嘅研究絲絲以前都聽過，大概係話生得靚啲，談判時會着數啲，有多啲議價能力！
而今次呢個研究亦一啲都唔馬虎，佢哋從標普500嘅企業中搵677位CEO做評估，首先根據「面部黃金比例」為CEO評分，以得出「樣貌吸引力指數」，再做不同測試，包括分析由一九八五年至二○一二年間1,830宗併購個案，以及CEO上任首日嘅股價表現等。
雖然論文中並無特別提及任何一位CEO，但研究學者喺接受訪問嘅時候就提到，於芸芸嘅CEO當中，佢哋認為雅虎嘅邁耶就係一個好好嘅例子。
根據佢哋嘅研究，邁耶喺「樣貌吸引力指數」中獲得8.45分（10分為滿分），而雅虎亦的確喺佢上任後表現做好，股價升約1.5倍！
不過佢哋都有強調，研究唔係鼓吹公司單靠外表尋找CEO，而忽視其他工作能力等條件，只係呼籲企業招聘CEO嗰陣，可以嘗試將外表納入為其中考慮因素。
余絲韻