聯儲局正式開始退市，主席伯南克又未有調整前瞻指引，將失業率目標由6.5%向下調整至6%，旨在將退市同加息劃清界線。聯儲局短期內啟動退市，對新興市場的影響自然不在話下，對美元都有直接影響。
聯儲局象徵式先減100億美元，令美元短線爆升機會降，可能令美匯指數續於79至81.5上落。不過，一旦啟動退市，點都好算係行出第一步，美元始終值得中線睇高一線。
睇番歐元區，十一月通脹率按年由十月的0.7%回升至0.9%，雖然按月計都仲未完全擺脫通縮風險，惟再一次證明央行行長德拉吉的言論信得過！
不過，自從上月意外減息後歐元又上番，央行白白浪費咗一粒子彈，令歐洲刺激出口的計劃受到影響，今年歐元之強勢反而令德拉吉進一步放鬆銀根的機會不容抹殺。
歐元雖然跌唔落，似乎交易員覺得唔炒上升穿1.3830唔心死，但歐元區經濟繼續兩極化，依家買歐元似乎唔係幾安心，升穿1.3830相信都未必企得穩。一旦升穿1.3830，可以睇睇有無跟進買盤，睇吓歐元可以挾到幾上，如在4小時內跌番穿1.3830，就反映無人跟進，到時先順勢沽，並以當時最高位為止蝕。另外，一定要睇埋歐元兌日圓，今年由年頭升至年尾，喺最後幾個交易日會唔會有獲利平倉，都直接影響歐元走勢。
GMO CLICK環球通副總裁 陳健豪