絲絲講場：基金界廚魔「煮」持大局
德盛安聯大中華及東南亞機構業務總監余天佑興趣多多，原來仲係「基金界廚魔」，中、日、韓、西餐都難佢唔到，除咗咕嚕肉，同乾炒牛河仲未學識，茶記都無嘢係佢煮唔到！
估唔到除咗揀基金有眼光之外，余天佑對烹飪都有研究。話說尋日食鐵板燒，佢見到個爐頭簡直係兩眼發光，咁啱大廚行開咗，佢即刻攝埋位想露返兩手！
放工落廚樣樣皆精
聽講佢平時放咗工仲會落廚，網Grill魚柳，煎吓牛扒，Work-life-balance其實都幾簡單o架！嫌網燒魚柳太「入門級」？咁生炒糯米飯夠神級喇掛？淨係要啲生米煮成熟飯，都炒到手軟，之但係余天佑炒到似模似樣。
賣相好，唔知味道又有幾得？咁緊係要聽吓Third party點評啦，早排「基金界廚魔」請一班朋友上佢屋企食消夜，係咁易炒咗碟肥牛炒公仔麵咋，受歡迎指數爆晒燈，連食齋嗰位朋友都把持唔住，真係罪過！
拿！啲人成日話識煮飯嘅男人特別Charm，計絲絲話，放咗工仲肯落廚嘅男人仲Charm，各位女士，如果你嘅另一半煮到似廚神咁，你哋要小心佢哋啲Charm瀉晒出嚟呀！
余絲韻