歐美多間投資銀行呢兩年因捲入操控倫敦銀行同業拆息（Libor）等醜聞被重罰，幕後「功臣」原來係大行之間交易員電子聊天室嘅對話紀錄。投行大班自此視聊天室為洪水猛獸，繼瑞銀同花旗後，摩根大通同德銀亦祭出「禁」令，限制員工用聊天室。
據聞摩根大通今個禮拜開始，禁止交易員經聊天室同其他投行嘅行家通訊，仲考慮緊連個人單對單嘅對話都唔准。月初先被歐盟重罰7.25億歐元嘅德銀就去得更盡，出年開始將原先只限於定息資產、外匯交易部門嘅聊天室禁令，延伸到投行以及成個交易銀行業務！
其實投行嘅處理手法唔可以話錯，始終都叫努力令市場更加公平。有行內專家認為，單單禁聊天室並唔足夠，監管要禁埋手提通訊設備先至夠法力。
當然反對聲音都唔少，認為投行咁樣做或會窒礙訊息流通，對金融業發展並無益處；況且圖謀不軌嘅交易員如果立心要食大茶飯，肯定會用更加複雜嘅途徑逃過法眼。
「禁令」原來都有商機，彭博社眼見大行頭痛點樣加強操控聊天室，最近推出一項新嘅訊息終端，員工嘅對話會Show晒喺個顯示器度，等法規部嘅同事監察，有問題嘅時候可以及早處理。
之但係彭博要爭客就趁早啦，事關研究機構Markit會加入競爭；況且有銀行擔心喺彭博終端機嘅舉動，會受到彭博記者監察呀。
余絲韻