Market Insight：光伏股小注怡情

講到尾，美股今年累積升幅唔少，上個月美國失業率回到7%，進一步逼近伯南克提出的退市界線6.5%，促使估本周二、三聯儲局議息後宣布縮減每月850億美元買債規模的分析師比例，漸漸過半數，股市獲利回吐，也是無可厚非。

古勝依然認為，聯儲局好大可能有拖無欠，拖得就拖唔退市住。客觀環境，伯南克任內只剩兩次議息會議，現時美國通脹相對溫和，畀聯儲更大空間可以睇定先出手，尤其新舊主席任期即將交接，萬一開了退市第一槍後，明年初就業市場表現又轉弱，新上任的耶倫在政策延續方面將十分頭痛。睇相佬呃你十年八年，在下估退市唔係十二月，亦唔係一月，起碼到三月或者四月機會至較大，就算要退，規模都只會係100億美元一次咁慢慢減。加息？至少一五年底！

古勝冇點你2013/12/16

萬里長空

蟹貨區阻力非輕

近排港股表現都幾令人失望，今年個市再一次挑戰24,000點阻力失敗，上星期的跌市，把恒指十一月十八日以過千億成交下留低的23,050至23,390點上升裂口都補埋，即係三中全會改革詳細內容曝光後入市追貨的散戶以至大孖沙，統統都要做蟹，未來定必要有更勁的利好消息，以及更大筆的新資金入市，先至可以消化23,390至24,111點區域內的蟹貨。

今年唔少對沖基金表現唔錯，跑贏大市一大截，尤其鍾情博彩股的一類，事實依家幾隻賭股晒士都唔細，金沙（01928）、銀河（00027）、永利澳門（01128）、新濠博亞（06883）、澳博控股（00880）以及美高梅（02282）統統市值過千億，加埋一齊市值達1.4萬億，「晒士」差千多億就拍住大笨象滙控（00005），有充足交易深度兼beta夠大，仲要今年跑贏恒指足足40至125%。內地網股有多少趨勢，會緊接成為對芬佬炒賣新寵，可惜暫時仲係得隻騰訊（00700）夠斤兩，普遍市值仲係太細未成氣候。

不過，睇最近阿里巴巴集團搵海爾電器（01169）合作搞物流，即時發揮到金手指作用，或者等阿里都上埋市，個市多個選擇，做到「成行成市」，到時氣氛先會達到高潮。好似博雅互動（00434）及IGG（08002）等歸邊半新股，賭身家就唔建議，但小小哋捧吓場，放埋三幾個月，或者有意外收穫。

近排成日提及處理霧霾問題的受惠行業，有朋友問起光伏股。毫無疑問，「十二五」規劃提及至一五年全國光伏機組達到35GW的遠大目標，但光伏股之難炒在於，上游公司永遠面對供過於求的麻煩，最近有調查機構話，內地光伏設備年產能力達40GW，實際出貨不過11.5GW，產能過剩到離晒譜。

行業呈先天不足

至於下游方面，成日被中央補貼金額傳聞左右，再者，唔少下游光伏發電公司本身估值行得太前，好似拍住中國招商、國家電網及保利協鑫（03800）等龍頭企業的金保利新能源（00686），一○年先轉型，幾年間不斷收購光伏發電場，基地遍布青海、甘肅、新彊、江蘇，啱啱仲話諗緊前海。計埋可換股票據，現價1.74元的金保利，潛在市值達85億元，估值幾乎透支緊一五年盤業績，投資者肯唔肯畀兩年後嘅估值買嚟貨，見仁見智。

古勝講過好多次，今時今日，個市好似得番有概念但貴到死，又或者平到極但業績一般兼無故事、無人吼兩類股票。不過，早幾日金保利大股東以1.7元減持近10億股，股價一度插水去到1.45元，之後幾日拗腰上番嚟，守得住基金接貨價，純投機角度，短期似乎有點睇頭。

恒安價跌成交增

上周五兩隻紙品股有沽壓，恒安國際（01044）股價曾跌至91元，收報91.25元，跌4.8%，乃上月中旬以來首次在50日線樓下收市，成交大增至4.94億元；維達國際（03331）亦曾低見12.88元，收報12.94元，跌5.4%。係咪板塊估值太高基金沽貨食胡，不得而知。

恒安股價已回補上月中旬的上升裂口位，14日RSI已回落至39，若只屬短線調整，應可在本周收復50日線（93.2元），但若然未見反彈，宜待試85至88元水平承接再作部署。

古勝