歐元區近日經濟數據開始參差，反映雖然歐洲經濟最壞時間已過，惟反彈到依家，引擎又開始無力，睇嚟歐洲央行都要繼續諗諗辦法，進一步刺激先有可能持續復甦。
匯市上，其實一直反映緊呢個趨勢，交叉盤很大程度是受基本因素帶動，例如歐洲經濟由下半年開始復甦，睇睇美國傳統基金和ETF等歐洲股票基金，已經連續22個星期錄得資金流入，全年頭11個月流入規模高達200億美元。
拆細睇，當中40億美元係由第三季數據好轉時流入。相反，日本央行繼續印銀紙，睇番日本十年國債孳息，比起年中曾經接近1厘水平，仲不升反跌至0.65厘。日本投資者買國債無法取得預期的回報，自然要諗辦法「走出去」，其中十月尾更錄得流出1.26萬億日圓買外國證券，直接令歐元兌日圓持續攀升。
聽聞好多大行Trade嘅Bonus由每季計數改為每年一度，如果係咁，十二月再大手交易嘅誘因就減少，故再將歐元兌日圓推上去嘅機會就減低，獲利平倉誘因反而加大，短線阻力143.80，重要支持在138.50至140。
GMO CLICK環球通副總裁 陳健豪