日本畀通縮困擾咗十幾年，打工仔份糧有跌冇升，呢種苦況，原來貴為日本央行行長都要受埋一份！呢啲會唔會就係日本央行多年來都根治唔到通縮，對行長嘅懲罰呢？
話說日本央行早前公布，行長黑田東彥截至三月底年薪2,400萬日圓（約182.2萬港元），大家冇睇錯，的而且確得十幾萬港紙一個月，比起十五年前速水優做行長嗰時，經通脹調整後嘅3,900萬日圓，冇咗差唔多四成！據日本當地嘅地產佬估計，如果黑田想喺東京市中心買一間十年樓齡嘅三房住宅單位，以依家做行長嘅薪酬嚟計，足足廿五年嘅薪酬，期間一亳子都冇得使，先買得起啊！
平心而論，黑田嘅年薪同其他央行行長比較，公認係比較奀嘅，例如南韓央行嘅金仲秀同歐洲央行嘅德拉吉，去年年薪分別都有31.4萬美元（約244.9萬港元）同48.5萬美元（約378.3萬港元），香港金管局總裁陳德霖，年薪更加有120萬美元。但日本貴為全球第三大經濟體，市場人士見到連央行行長嘅人工都縮水咁多，唔驚就假。
事關日本雖然人工停滯不前，但通脹開始回升。日本國債資產管理日本債券組組長加藤章夫警告，如果人工再冇上漲，更高嘅物價只會削弱國民購買力，令佢哋更加唔去消費，隨時將經濟推冧。高盛首席日本策略師Kathy Matsui亦都呼籲，日本政府要諗計刺激工資上漲。
余絲韻